Isa 63 | NdeIBE | STEP | Ngubani lo ovela e-Edomi, ovela eBhozira egqoke izambatho ezibomvu na? Ngubani lo ogqoke ubucwazicwazi, ohamba ngobukhulu bamandla akhe na? “Yimi okhuluma ngokulunga, olamandla okusindisa.”

Isaiah 63

Usuku LukaNkulunkulu Lokuphindisela Lokuhlenga

1 Ngubani lo ovela e-Edomi, ovela eBhozira egqoke izambatho ezibomvu na? Ngubani lo ogqoke ubucwazicwazi, ohamba ngobukhulu bamandla akhe na? “Yimi okhuluma ngokulunga, olamandla okusindisa.”

2 Kungani izigqoko zakho zibomvu njengezomuntu onyathela isikhamelo sewayini na?

3 “Nginyathele isikhamelo sewayini ngedwa; kakho owezizwe owayelami. Ngabagxoba ngithukuthele, ngabanyathela ngilolaka; igazi labo lachaphakela ezambathweni zami, langcolisa zonke izigqoko zami.

4 Ngoba usuku lokuphindisela lwalusenhliziyweni yami, lomnyaka wokuhlenga kwami usufikile.

5 Ngakhangela, kodwa kakho owayengasiza. Nganengwa yikungabi khona kosekelayo, ngakho ingalo yami yangilethela insindiso lolaka lwami lwangiqinisa.

6 Ngagxoba izizwe ngokuthukuthela kwami, ngazidakisa ngolaka lwami, ngathela igazi lazo phansi.”

Ukumdumisa Lokukhuleka

7 Ngizalandisa ngomusa kaJehova, izenzo okumele adunyiswe ngenxa yazo, ngakho konke uJehova asenzele khona yebo, izinto ezinengi ezinhle azenzele indlu ka-Israyeli, ngesihawu sakhe langomusa wakhe omkhulu.

8 Wathi, “Ngeqiniso bangabantu bami; amadodana angayikuba lamanga kimi”; ngakho waba nguMsindisi wabo.

9 Kukho konke ukuhlupheka kwabo laye waba losizi; ukuba khona kwengilosi yakhe kwabasindisa. Ngothando lwakhe langesihawu sakhe wabahlenga; wabaphakamisela phezulu, wabathwala izinsuku zonke zakudala.

10 Kodwa bamvukela badanisa uMoya wakhe oNgcwele. Ngakho waphenduka waba yisitha sabo walwa labo yena ngokwakhe.

11 Lapho-ke abantu bakhe bakhumbula izinsuku zakudala, izinsuku zikaMosi labantu bakhe – Ungaphi lowo owabachaphisa ulwandle, lomelusi wemihlambi yakhe na? Ungaphi lowo owathela uMoya wakhe oNgcwele phakathi kwabo,

12 owathumela ingalo yakhe yamandla elodumo ukuba ibe sesandleni sokudla sikaMosi, owehlukanisa amanzi phambi kwabo ukuba azizuzele udumo olungapheliyo,

13 owabadabulisa ezinzikini na? Njengebhiza emagcekeni, kabakhubekanga;

14 njengezinkomo zisehla esigodini, baphunyuzwa nguMoya kaJehova. Wena wabakhokhela kanjalo abantu bakho ukuze uzenzele ibizo elilodumo.

15 Khangela phansi usezulwini ubone usesihlalweni sakho sobukhosi esiphakemeyo, esingcwele, esicwebezelayo. Kungaphi ukutshiseka kwakho lamandla akho na? Isisa sakho lesihawu sakho kugodliwe kithi.

16 Kodwa wena unguBaba wethu lanxa u-Abhrahama engasazi thina lo-Israyeli engasivumi; wena, O Jehova, unguBaba wethu, uMhlengi wethu libizo lakho kusukela endulo.

17 Kungani, hawu Jehova, usenza siphambuke ezindleleni zakho, usenza lezinhliziyo zethu zibe lukhuni ukuba singakwesabi na? Phenduka ubuye ngenxa yezinceku zakho, izizwana eziyilifa lakho.

18 Indawo yakho engcwele yayingeyabantu bakho okwesikhathi esifitshane, kodwa khathesi izitha zethu seziyigxobele phansi indlu yakho engcwele.

19 Thina singabakho kusukela endulo; kodwa awukaze ubabuse, kabazange babizwe ngebizo lakho.